Prvi događaj bil je va OŠ Srdoči četrtak 23.02.2017. kad se je održala radionica, tako se to sad zove, o tradicije maškaranja pul Srdoč, a poslušala su to vesela i namaškarana deca 3. razreda učiteljice Gordane Vukić. O toj tradicije povedali su judi z’ grupi Srdočeveh maškar i to Branko Srdoč, Rajko Mataija, Mladen Mataija i Aco Stolić, prikazan je gps puta maškar na pusni pundejak, prnesla sej’ grana bambusa, ča se zove “maj” pa su deca to kitila z’ trakama krep karti va puno boj. Nekad je taj “maj” bila javorika, ma je radi težini zamenjena z bambusom. Ovaj “maj” nosi se al hodi na početke povorki od maškar. Dece je pročitana pjesma “Srdočeve maškare” Antonia Babića z njegove Čakavske teki, ka najboje govori o posebnosti maškaranja pul Srdoč. Čula se je z CD-a himna maškar od Srdoč, čigovi su autori besed i muziki Mirela i Davir Trkulja, i ka je snimljena va muzičken studije David. Najvažneje va ten maškaranju kako se je moglo i čut je da se na pusni pundejak obajdu Srdoči, da se na dan Pusta gre va posjet Kastvu,- da se doma puste brigi i veselo se to pasuje. Za ovu priliku z krafnami je seh častila Pekara Šumci.
Drugo pusno događanje, već tradicijsko, bilo je na pusni pundejak 27.02.2017. na polne na komunjskoj šterne va centre stareh Srdoč, radi okupljanja i ispraćaja Srdočeveh maškar na obilazak naselja, uz doček Zametskeg zvončari i maškar.
Ovo leto je se oko ovega događaja bilo lepo od vremena do bogatega stola, vesele muzike i dosta judi. Uglavnom veli šršur. Nakon ča su šle ća Srdočeve maškare bilo je malo manje šršura ma se je on jako pojačal kad su zazvonili Zamećani.
Mislin da su si ki su prišli prnesli neč za na stol, najveć je osigurala Mavrica i člani iste.
Najveć su prnesle i delale Zvezdana, Vidojka, Sanja, Neva, Nada, Mladenka i još neki nisam se zapametila, ću popravit drugi put. Fažol je odlično skuhal Mirko, a kruh nan je darovala Pekara od Blečić.
Jako nas je razveselil naš najstareji 94-godišnji mještan Josip Sučev kega je pripejala njegova vnuka Sanja da nas vidi aš maškare i pusni pundejak jako puno let nisu mogli pasat bez njega i njegove armunike, ma ovo leto je ni prnesal ni sopal aš ni bil vaš pravi za to, ma je bil vesel, malo je sedel s nami pa i zakantal. Mej Zametskemi zvončari su njegovi dva praunuka ki nastavljaju tradiciju maškaranja, a se smo to i slikali neka ostane za uspomenu
Trećo pusno događanje bilo je dan potle pusnega pundejka, na dan Pusta 28.02. kad su školani naše Školi obahajali naselje oko 11.00 ur, a onda osudili i zapalili pusta na školsken igralište.
Vaje za ten oko 11.30 Srdočeve maškare su posjetile Školu prej nego ča već isto po tradicije gredu va posjet Kastvu. Va Škole je bilo živo, veselo, velo šušuranje, deca su uživala, a dočekali su ih ulenjaki (fritule) i soki.
Ovo bi bilo se o maškarama pul Srdoč ovo leto, verujemo da je veselje i šršur ki se je dogajal prnesal da zima finjuje, gre ća i da nan sen prihajaju lepši tepleji dani proljeća.

Malo više o tome, zajedno sa fotografijama pogledajte ovdje: Maškare pul Srdoč 2017
Nada Paladin, Udruga Mavrica – Srdoči